KRALENDIJK- Riba 10 di mei 2025 a suspendé trabou na un sitio ku trabounan di demolishon ta tuma lugá, kaminda ku tin sospecho ku a deshasí di plachi di dak ku tabata kontené asbèst.
Direktorado di Supervishon i Mantenshon di Entidat Públiko Boneiru (OLB) tabata enkargá ku e suspenshon i Inspekshon di Labor di e unidat di RCN Asuntu Sosial i Empleo (SZW) lo tuma e kaso i sigui ku investigashon mas aleu.
Segun Inpekshon Laboral e situashon ta mustra kon importante ta pa atendé kuidadosamente ku material ku posiblemente ta kontené asbèst. “Ta importante pa laga un eksperto tèst plachinan di dak òf otro material ku tin sospecho di ta kontené asbèst, pa determiná si realmente nan ta kontené asbèst. Atendé di manera inkorekto ku asbèst por okashoná konsekuensia serio pa salú di empleado i bisiñanan” asina tin skibí den un komunikado pa prensa.
Regla i lei
Tambe e Inspekshon ta atvertí ku tin un kantidat di regla i lei ku mester tuma na kuenta ora di traha ku asbèst. Esakinan por haña entre otro den e Dekreto di Seguridat Laboral IV Hulanda Karibense.
Ora violá a reglanan aki tin chèns ku ta para e trabou, manera a sosodé den e kaso aki. Tambe por duna but na esnan ku ta violá e reglnan aki. Pa mas informashon tokante reglanan rondó di traha ku asbèst bo por bishitá e wèpsait di RCN òf tuma kontakto ku e departamentu di Inspekshon di Labor di SZW via arbeidsinspectie@rijksdienstcn.com