DEN HAAG – Interparlementair Koninkrijksvoerleg (IPKO) a finalisá. Delegashonnan di Parlamentu General – Eerste i Tweede Kamer – i di Parlamentu di Aruba, K òrsou i Sint Maarten a reuní bou di guia di presidente di komishon fiho pa Relashonnan di Reino di Tweede Kamer, Mariëlle Paul, riba temanan importante di Reino.

E temanan sentral tabata: e konseho no solisitá di Raad van State di Reino tokante Reino, tratadonan i e Derecho di Union, leinan di konsenso, kolaborashon dentro di Reino i e défisit demokrátiko,  kolonialismo i pasado di sklabitut. 

Programa i lista di akuerdo

E reunion a kuminsá djasabra 27 di sèptèmber ku un apertura den sala plenario di Eerste Kamer. Representantenan di e delegashonnan di Parlamento i e lider di delegashon di e delegashon di Parlamentu General, Paul Rosenmöller (Groen Links), tabatin e presentashon di e desaroyonan resien den e kuater paisnan na su enkargo.

Mèrdia a sigui ku e reunion den Tweede Kamer ku komo puntonan di agenda e konseho no solisitá di Raad van State di Reino i e tema leinan di konsenso.

Djarason 28 di sèptèmber e partisipantenan a para ketu na kolaborashon dentro di Reino i défisit demokrátiko, tambe kolonialismo i pasado di sklabitut.

Djaweps 29 di sèptèmber a hasi un bishita di trabou na Floriade kaminda e tema tabata produktonan alimentisio i nan durabilidat. Investigadónan di Wageningen University & Research tambe a duna nan aporte e dia ei.

E reunion interparlamentario a finalisá djabièrnè 30 di sèptèmber ku komprobashon i firmamentu di e lista di akuerdo i un konferensia di prensa ku e kuater presidentenan di e kuater delegashonnan a tene.

Ta tene e IPKO un biaha kada seis luna. Na yanüari ta ten’é na un di e paisnan di Reino den Karibe i na mei/yüni na Den Haag. Durante di e reunion di IPKO e parlamentonan di Hulanda, Aruba, Kòrsou i Sint Maarten ta interkambiá informashon di temanan aktual i importante di Reino.