KRALENDIJK – Bonaire Human Resources Organisation (BHRO) pa boka di presidente James Finies ta bisa ku e desaroyo demográfiko rápido ta kousando hopi tenshon entre e habitantenan original di e isla i hende ku a muda bin e isla mas resientemente, spesialmente di orígen Hulandes.
“Resientemente Boneiru tabata tin un promé konfrontashon públiko entre habitanten lokal i inmigranten Hulandes den un lugá di entretenimiento popular. E insidente a demonstá e situashon sosial tenso ku ta kresiendo pa motibu di e kambio demográfiko i kultural ku e isla a pasa den e añanan tras di lomba,” segun Finies a bisa.
BHRO ta indiká ku for di 2010 Boneiru a hiba un polítika di imigrashon sin restrikshon, ku a resultá den un kambio signifikante den e komposishon di e populashon. “Na aña 2024, e habitantenan lokal ta forma ménos di 30% di e populashon. Esaki ta lanta hopi preokupashon, kaminda hopi Bonairiano ta sinti nan marginalisá riba nan mes isla, tantu kulturalmente komo ekonómikamente. E tenshon ta reflehá e prekupashon pa mantené e identidat i kultura Bonairiano.”
Konsientisashon
Organisashonnan manera BHRO ta hibando kampaña di konsientasisashon i rekonosimentu internashonal pa protehá e posishon di e habitanten original, den línea ku e karta di Nasionanan Uni pa áreanan ku no ta goberná nan mes.