James Kroon ta terminá su periodo komo Lider Polítiko di UPB

KRALENDIJK- Despues di un Periodo di mas o ménos 12 aña, James Kroon ta terminá su periodo komo Lider Polítiko di UPB. 

Den un reunion ameno ku entre otro Direktiva di UPB djasabra, aktual Diputado James Kroon a entrega su karta di retiro komo Lider Polítiko di UPB. James Kroon a sigui Ramonsito Booi i Elvis Tjin Asjoe komo respektivamente Lider Polítiko i Lider Polítiko interino di UPB. 

Ramonsito Booi a keda pa un periodo di 14 aña komo Lider Polítiko di UPB. Prome ku Ramonsito Booi, Rudy (Ruman) Ellis a liderá UPB di mas o menos 27 aña konsekutivo.

UPB ta bisa di ta gradisí James Kroon inmensamente pa e tempu ku ela liderá partido. “No tabata e periodo di mas fásil di UPB. Sinembargo James a mantené UPB fuerte, aktivo i di importansia pa guia polítiko di Boneiru. Un di e hopi logronan di James Kroon durante di e periodo aki tabata ku UPB a resultá di ta e partido ku por a mantené algu di stabilidat polítiko na Boneiru. Banda di esaki komo Lider Polítiko James a sòru pa e organisashon ta sano i ku su asuntunan atministrativo ta na òrdu. UPB ta e úniko organisashon polítiko ku tin un sede fiho i aktivo durante henter aña. Tur esaki danki na James Kroon”, asina un komunikado di prensa di parti di UPB ta bisa. 

Lider interino

For di despues di e momentu ku Kroon a baha, i te ku otro aviso, Maritsa Silberie lo asumí Liderazgo Polítiko interino di UPB.