WILLEMSTAD – Jean-Julien Rojer a gana dòbel maskulino den e torneo di tènis na Stockholm. Huntu ku su sosio Marcelo Arevalo di El Salvador nan a derotá Harri Heliovaara i Lloyd Glasspool ku 6-3 i 6-3.

Tabata nan di kuater título riba nivel di tour di e temporada na Stockholm Open. Den un espektákulo fuerte nan dos a sali viktorioso  den 67 minüt na e evento ATP 250 aki.

Arevalo i Rojer a partisipá pa promé biaha despues ku na sèptèmber nan a logra e semi final di US Open. “Hopi emoshonal p’ami”, Rojer a bisa. “Ora bo ta birando grandi, e fin ta kuminsá yega serka, pues kada eksperensia positivo ku bo por haña ta bunita i bo ta apresiá esei mas ainda”.

Mas promé den e temporada aki e pareha a gana riba nivel di tour na Dallas i Delray Beach promé ku nan a gana nan promé Grand Slam na Roland Garros. Na novèmber e tim Salvadoreño-Hulandes lo partisipá na Nitto ATP Finals na Turijn, despues ku luna pasá nan a kalifiká pa e evento prestigioso di fin di aña.

Ta di tres biaha ku Rojer ta gana e torneo di Stockholm, pero awor pa promé biaha ku sosio Marcelo Arevalo.