KRALENDIJK – Dùmpmentu ilegal di sushi ta forma un menasa kresiente pa medio ambiente, salú di e pueblo i infrastruktura lokal na Boneiru. Pa enfrentá e problemátiko aki, Direkterado di Supervishon i Mantenshon (Directie Toezicht en Handhaving) ta lansa un kampaña di konsientisashon ku e meta di animá habitante i empresa pa asumí responsabilidat den e manehó di sushi.
Segun un portaboz di e direkterado, dùmpmentu ilegal di sushi tin konsekuensia leu i ta nesesario pa tur hende asumí nan responsabilidat. Pa medio di un kampaña mediátiko via medio sosial, radio i televishon, gobièrnu ke pone e impakto negativo di sushi sin kòntròl den spòtlait i kompartí tep práktiko pa un mihó maneho di sushi.
Ku e kampaña aki, Direkterado di Supervishon i Mantenshon ta spera ku tanto habitante komo empresario bira mas konsiente di nan ròl pa krea un medio ambiente limpi i sostenibel.