Notisia

Kampionato mundial di beisbòl U-18 a kuminsá djabièrnè 9 di sèptèmber ku e wega entre Reino Hulandes i Estados Unidos 

Miquel Willem, ñetu di Nòchi Willem ta forma parti di selekshon di Hulanda

BRADENTON – Djabièrnè 9 di sèptèmber e kampeonato mundial di beisbòl U-18 a kuminsá den Lecom Park na Bradenton Florida ku e partido entre Reino Hulandes i Estados Unidos.

E ekipo di Reino Hulandes a kuminsá e kampeonato ku un entusiasmo haltu, ora ku for di den tempran nan a bai dilanti ku e skor di tres pa nada kontra e ekipo di U.S.A. ku dos homerun konektá. Un homerun di parti di Kendrey Maduro ku un koredó na base i despues un solo homerun di parti di Jayden Mohammed. E dos ekiponan a sigui batayá ku otro manteniendo e skor na tres pa nada.

Tabata den di kuater inning ku e merikanonan a empatá e wega. Den e di sinku inning Estados Unidos a lòs ku un rally di 5 kareda ku un grandslam di parti di Bryce Eldridge. Finalmente USA ta gana e partido ku e skor di 9 pa 3.

Djasabra 10 di sèptèmber pa motibu di awaseru pisá mester a kanselá e partido entre Reino Hulandes i Sur-Afrika. Ayera, djadumingo 11 di sèptèmber Reino Hulandes a enfrentá e ekipo di Canada. Un wega emoshonante ku un gran pitcheo pa ámbos banda. Tabata sinembargo e ekipo di Canada ku a bai dilanti ku e skor di dos pa nada i a wanta e bentaha aki te den di shete inning. Ora tur speransa a kaba serka e fanátikonan di Hulanda i ku dos out, a bolbe presentá e dicho ku miéntras e delaster out no kai, wega no a kaba. 

Ku dos out, e bateadó Justin Dambruck ta konektá un hit, siguí pa un deadball di Alexander Albertus. Ku dos hòmber na base Jakey Josepha ta konektá un triple entre lèft i sènter, empuhando e dos karedanan pa asina empatá e wega. E siguiente bateadó Kendrey Maduro ta risibí un base por bola intenshonal. Ku dos koredó na e dos skinanan, Gedionne Marlin ta konektá un rolling pa shòrt, kual lo mester a bira fásil e di tres out di e inning. Enbes di fòrsa e out na segunda base e shòrtstòp ta disidí di bai pa primera. E bala ta resultá haltu di moda ku e primera base mester a bula pa kue e bala. Ku esaki e koredó Gedionne ta logra yega pisa e primera base promé i e kareda di viktoria ta anotá na home. Ku esaki Hulanda ta gana Canada ku e skor di tres pa dos lagando e ekipo Canades den tereno.

Awe e ekipo di Reino lo enfrentá Brasil pa 11’or di mainta.

Deel dit artikel
Rocargo
Rocargo
Rocargo
Rocargo