Kralendijk– Komo parti di planifikashon pa 2022,Tourism Corporation Bonaire (TCB) a kondusí un analisis di inventario di kambernan, pa asina haña un miho bista di kambionan den e sektor di akomodashon i nan kapasidat di kambernan disponibel. E estudio ta mustra ku e kantidat di kamber na Boneiru lo kasi redoblá den apenas dos aña di tempu.

“Ta importante pa kondusí tipo di estudionan aki pa por kompronde e merkado miho i su desaroyonan. Nos ta apunto di kuminsá risibí buelo adishonal for di nos merkado primordial kual ta Merka, i ta mirando un kresementu den futuro pa kupo di trabou, i ta ku e tipo di estudionan aki nos por antisipá miho i tambe prepará pa futuro,” asina Miles Mercera, direktor interino di TCB a splika.

TCB resientemente a identifiká e áreanan di proyektonan di maneho di data ku lo keda ehekutá den e próksimo simannan ku ta inkluí prestashon i rendimentu di hotèl, eksperensia di bishitantenan i mas.

E resúmen di e estudio di inventario di kambernan ta inkluí data i partisipashon di hotèl, apartamentu, vila i hürmentu di ‘real estate’. E resultado di e estudio ta mustra ku na Boneiru aktualmente tin un total di 2.182 kamber disponibel. E total na 2019 tabata 1.749 kamber. Den 2020, tabatin un kresementu di 433 kamber. TCB ta antisipá ku pa 2021/2022 lo tin un kresementu di 715 kamber, kual lo resultá den un total di 2.897 kamber na fin di 2022.

E oumento di kambernan adishonal ta den kombinashon di propiedatnan eksistente ku adishon nobo òf proyekto di ekspanshon manera Delfins Beach Resort, Plaza Resort Bonaire, Captain Don’s Habitat, Resort Bonaire, Grand Windsock i/òf desaroyo di ‘condo’, pero tambe ta inkluí adishon nobo manera Bloozz Resort Bonaire, Time to Smile Chogogo Dive & Beach Resort i Sunset Beach Resort.

Kupo di trabou

TCB lo kontinuá ku esfuersonan di desaroyo di kapital humano komo ku TCB ta antisipá un kresementu den oportunidat di empleo pa nos hendenan lokal. Ku e kresementu di inventario di kamber nos ta spera un mínimo di 1.000 kupo di trabou adishonal den e industria di turismo. Esaki ta ekskluyendo e oportunidatnan di trabou indirekto. TCB lo enfoká riba un variedat di  inisiativanan di kapital humano den futuro pa atraé i inspirá Boneiru su talentonan lokal pa forma parti di e oportunidatnan ku ta na kaminda.