Kantidat di kaso nobo di Covid-19 ta sigui haltu

KRALENDIJK- A pesar di e echo ku gobièrnu na Boneiru ta keda asigurá ku e fuente di mayoria kontagio na e isla ta konosí, e kantidat di kaso nobo pa dia ta keda relativamente haltu.

Pa djadumingu atrobe tin un kantidat di 15 kaso nobo na Boneiru, riba un total di 40 hende ku a pasa tèst. Esaki ta nifiká ku mas ku 1 den kada tres hende di tèst ta resultá positivo.

E kantidat total di kaso aktivo tambe a sigui subi i a yega un total di 142, 15 mas ku tabata e kaso djasabra.

Monitoriá

Gezaghèber Edison Rijna den un konferensia di prensa djaweps a bisa ku lo sigui vigilá e desaroyo den kantidat di kaso nobo riba nos isla. Si e kantidat di kontagio no baha, i e total ta sigui subi, no por ekskluí ku bin ku medida nobo. Te asina leu ta ripará sí ku e kantidat di hende ku ta resultá den hospital pa motibu di un kontagio ku Covid-19 aktualmente ta keda bou di kòntròl. Esaki tambe ta un faktor importante pa disidí si lo bin ku medida nobo sí òf no.