Kantidat di kontagio nobo ta keda fuente di preokupashon

Kralendijk- Ounke ku e sifra di kasonan aktivo di Covid-19 ta sigui mustra un bahada, tòg e kantidat di hende ku ta tèst positivo ta keda un fuente di preokupashon.

Djabièrne di e 60 resultadonan di tèst ku a drenta, 18 a resultá di ta positivo, ku ta kasi 1 den kada 3 persona ku ta tèst. 50 hende a rekuperá di Covid-19. Segun dr. Marian Luinstra a splika den konferensia di prensa djaweps atardi, e kantidat di hende ku ta tèst positivo, ta keda un fuente di preokupashon.

Hospital

E kantidat di hende ku ta den hospital pa motibu di Covid tambe ta sigui subi. En total tin 19 persona den hospital. Tin 12 persona hospitalisá na Boneiru, 3 ta haña kuido intensivo. Tin 1 persona den hospital na Kòrsou, 1 persona den hospital na Aruba i 5 persona den hospital na Colombia.