KRALENDIJK- Un kas den e bario di Antriol a kima por kompleto djasabra algu despues di mèrdia. Apesar ku brantwer a yega i a hasi tur su posibel pa paga e kandela, e kas a keda destruí por kompletu.

Por a mira bastente huma na Kaya Buní na unda e kas tabat situá. Ta tin hopi hende a bin wak kiko tabata kimando.

Kima kos

Tabata algun minüt despues di 1or di mèrdia, ku e persona ku ta doño di e lugá, tabata kimando algun kos chikitu na e sitio. Dado momentu, el a tuma nota ku e kandela a ekspandé rápidamente i e no por a domin’é. Aki a yama brantwer pa atendé ku e situashon.

Brantwer a yega na e sitio den Antriol, poko pabou di Wing Cheung Supermarket.  Ta trata di un kasita grandura di un kònteiner di 20 pia. A dura un momentu promé a paga e kandela.

Lamentá

A papia ku e doño di e lugá i el a splika ku e no por a yuda ku loke a sosodé i e ta lamentá masha. El a bisa ku por konta ku 20 mil dòler a kima, na kontenido di loke e tabatin, den un fregá di wowo.