Kralendijk – Ya kaba kasi 400 persona a traha un sita ku Registro Sivil den e promé siman ku a lansa e wèpsait nobo di Entidat Públiko Boneiru (EPB). E wèpsait nobo tin e opshon pa traha un sita online. Por traha sita ku Registro Sivil pa diferente deklarashon òf petishon. 

Sifra di sitanan trahá for di 22 di aprel: 

Produkto	Kantidat
Attestatie de Vita	8
Bewijs burgerlijke staat	1
Bewijs van inschrijving	22
Emigratie (uitschrijven)	13
Geboorteaangifte	5
Huwelijkaangifte	2
Immigratie (inschrijving)	28
Legalisatie handtekening	2
Overlijden	1
Paspoort	56
Rijbewijskaart	57
Sedula (identiteitskaart)	168
Stamboomonderzoek	2
Verhuizen op Bonaire	13
Verklaring van woonplaats	19
Total	397

Ora un persona traha un sita online, e lo risibi un notifikashon via e-mail. Den e notifikashon aki tin skibí kiko e persona mester trese ora e bai e sita na Registro Sivil. Asina ei e por bini e sita ku tur  dokumento nesesario. “Mi ta kontentu ku hopi hende a hasi uso kaba di e sistema nobo akí. Poko poko lo sigui añadí mas servisionan di Entidat Públiko Boneiru na e sistema di traha sita online”, diputado Thielman a bisa.

Pronto lo ta posibel pa yena e pèrmitnan di konstrukshon online tambe. Na momentu ku esaki ta posibel EPB lo invita pueblo pa hasi uso di e opshon aki. Suidadanonan lo no ta mará na orarionan di servisio di EPB pa hasi nan petishonnan. E wèpsait ta bira EPB su lokèt digital ku ta habrí 24 ora pa dia. Tira un bista riba e wèpsait pa traha bo sita: https://bonairegov.com/pa/traha-sita.