KRALENDIJK- Djabièrnè 13 anochi, Kolegio Kristu Bon Wardador (KKBW) tabatin nan elekshon di Reina, Prens i Pancho di skol. Un show kaminda e muchanan a duna un tremendo presentashon. 

Sala di SGB tabata yen yen di hende, un bochincha di otro mundu. Grandi i chikitu apoyando e muchanan. Kada partisipante tabata bunita disfrasá, bon prepará. Huradonan sigur tabatin di bèrdat un tarea difísil pa yega na e ganadó. Muchanan partisipante a haña masha regalo, aparte di e premio pa e ganadónan.  

Ganadónan Prens i Pancho Infantil tabata Ian Doran i R’Zhion Josephia. Ganadónan di Prens i Pancho Hubenil a bai pa Roman-Shane Emerenciana i Krisander Martijn. E promé finalistanan tabata Riczard i Riandro Thielman.  

Reina Infantil KKBW 2023 a bai pa Candra Martijn. Promé finalista tabata Amelie Prado Klinger i na di dos lugá a sali Sophie Coffie.  

Loke ta trata Reina Hubenil Kolegio Kristu Bon Wardador 2023 a sali Elizabeth Prado Klinger i promé finalista a sali Nairoby Cecilia.  

Un anochi tur afó, yená ku hopi koló i talento. E ganadornan lo representá Kolegio Kristu Bon Wardador na e elekshon di Reina, Prens i Pancho di KLAVE.  

Fondo

Esaki ta e promé biaha ku Kolegio Kristu Bon Wardador ta organisá un elekshon di Reina, Prens i Pancho di nan propio skol ku e meta pa rekoudá fondo pa por forma parti di e Marchanan Hubenil 2023.