Den Haag- Klientenan di ABN-AMRO bibá na e seis islanan hulandes den Karibe, por tene nan kuenta bankario na e instituto pa awor. Resientemente ABN-AMRO a manda karta pa diferente kliente indikando ku nan tabata ker a stòp ku dunamentu di servisio. Voral na Kòrsou, vários klienta a risibí un karta di ABN-AMRO ku e mensahe aki.

E banko a disidí mientrastantu, pa hala e kartanan bèk aden. Segun e banko mes ta bisa, ta konsiderá ku nan a akuta di forma poko prematuro. Esaki spesialmente den kuadro di un lei ku ta wòrdu diskutí na hulanda, dunando tur hende ku un pasport hulandes un derecho di tin un kuenta bankario básiko, aunke sea ku nan ta biba pafó di hulanda.

Pa sierto hende, ku tin sea negoshi òf yu ku ta studia nan hulanda, ta ferfelu pa no tin un kuenta di banko hulandes, pa por hasi òf paga sierto kos. Te asina leu, ABN-AMRO tabata e úniko banko ku realmente a kuminsá avisá kliente di un posibel seramentu di kuenta.