AMSTERDAM – Preis pa pasashinan ta na punto pa subi konsiderablemente komo konsekuensia di un akumulashon  di impuesto di bula i medio ambiente, kombiná ku e krempmentu di aeropuerto Schiphol. Esei direktor general Marjan van Rintel di KLM ta bisa De Telegraaf.

E ta atvertí ku esaki lo kondusí biaheronan pa bula for di aeropuertonan di eksterior. “Den e periodo aki di keintura di kampaña e medidanan ta pasa riba otro. Tur partido polítiko ta papia di bulamentu, pero e konsentrashon mester ta riba polushon. Nos ta invertí miarnan den un flota mas ketu i mas ekonómiko. Ta basta ku e akumulashon di impuestonan nashonal ei; esei no ta promové durabilidat.”

KLM a hasi un ganashi di empresa bruto di 668 mion euro durante  promé tres kuartal di e aña aki, pero sinembargo ta keda ainda 40 mion euro atras riba aña pasá. “Nos ta bula ainda stanká i esaki tin keber ku gastunan haltu di personal i kombustibel. Nos ke amplia e kantidat di buelo pa asina generá mas entrada huntu ku un nivel di gastu ku ta keda igual. Nos por tabatin mihó resultado, pero ta hopi kontentu ku e resultado ku nos a optené,” segun Rintel.

KLM ta den e posishon pa por logra haña e kaminda pa subi ku e gastunan mas haltu, hustamente awor ku e gabinete ke pa Schiphol kremp, un punto di bista ku tur partido polítiko ta sostené? “Loke mi ta tende tambe ta ku mester gana plaka na Hulanda promé, promé ku nos por gast’é. Tur partido polítiko ta papia di bulamentu, pero mester papia di polushon. Nos ta invertí miarnan den un flota mas ketu i mas efisiente, loke ta duna resultadonan demostrabel. Pero ta basta ku e akumulashon di impuestonan nashonal; esei no ta oumentá e durabilidat. Hendenan ta pasa frontera gewon bai un otro aeropuerto i kompania di aviashon,” Rintel ta deklará den un kombersshon ku de Telegraaf.

E ehekutivo haltu di KLM ta aliviá ku a bari e impuesto di tránsito ku a proponé for di mesa. A rechasá un proposishon di CDA pa esaki djabièrnè anochi durante tratamentu di e Plan di Impuesto. E impuesto aki lo a kosta Schiphol te 34 porshento di e pasaheronan di tránsito. Pero Rintel ta atvertí ku e plan por bini gewon asina atrobe riba mesa ku un formashon nobo.

”E realidat ta ku ta ripará awor ku ta mihó pa traha palabrashonnan tokante ponementu di preis riba nivel Europeo i internashonal. Riba un pasashi pa Boedapest por ehèmpel tin kaba sesenta porshento na impuesto. I ta parse ku den polítika na Den Haag nan no a komprondé ainda ku pa motibu di medidanan Europeo di e programa di ekologisashon Fitfor55 un pasashi por bira asta mas ku 100 euro mas karo pa motibu di e derechonan di deskargo, impuesto di kerosin i mesklamentu di kombustibel alternativo,” segun e ehekutivo haltu. “E sektor di aviashon mester di un maneho di gobièrnu stabil.”