Kralendijk – Durante e reunion di Konseho Insular di djamars 8 di yüni, lider di frakshon di MPB, Elvis Tjin Asjoe a presentá un moshon ku ta pone atenshon riba diferente fasilidat pa piskadó ku a keda aseptá unánimamente.

E moshon ta trata diferente aspekto ku piskadónan tin mester pa asina nan por kumpli ku nan trabou di tur dia. Algun di e aspektonan aki ta ku e piskadónan no tin un área sigur pa mara nan boto. Ta eksistí un nesesidat grandi pa un área di mara tantu boto grandi komo boto chikitu di piskadó. Tin nesesidat tambe pa konstruí un ‘slipway’ pa boto di piskadó, boto rekreativo i tambe pa instansianan gubernamental i no gubernamental por hasi nan trabou. Por a nota ku e waf di piskadó na Sorobon ta den mal estado di mantenshon i e sitio kaminda nan ta baha boto ta bou di santu. Esakinan tur ta krea un urgensia pa sòru pa un sitio sigur pa asina piskadónan por ehersé nan trabou di tur dia.

Plan di desaroyo

E moshon ta instruí Kolegio Ehekutivo pa duna direktorado di R&O enkargo pa krea un plan di desaroyo pa e área di Te Amo Bich, kuminsando pabou di Port Bonaire te na e waf kaminda e barkunan di kombustibel ta mara i alabes pa kana e kaminda pa tuma bèk parti di e tereno destiná pa konstrukshon di hotèl na unda Courtyard by Marriott ta situá aktualmente.

“Nos ta mira ku e wafnan den sentro di siudat, entre otro Waf di Chachacha, Waf Nello Craane i e waf di piskadó na Playa Pabou a risibí mantenshon, pero esun na Sorobon kaminda habitantenan di Antriol, Sorobon, Nikiboko i Tera Kòrá ta frekuentá no ta na òrdu. Piskadónan tin ku lastra nan boto pa por drenta laman. Mester remediá esaki i krea e fasilidatnan nesesario pa nan tambe”, segun Elvis Tjin Asjoe, lider di frakshon di MPB.

Medio finansiero

Al final e moshon ta instruí Kolegio Ehekutivo pa medio di e departamento di finansa pa realoká medionan finansiero pa por krea fasilidat pa piskadó; entre otro konstruí un waf i lugá di hala i mara boto na altura di Port Bonaire i na Courtyard by Marriott. Pone fasilidat di awa di bebe, koriente i kámara di vigilansia pa seguridat i enkargá Piskabon ku e maneho di mantenshon via un kontrato di kuido.