KRALENDIJK – Dos kolaboradó di Sea Turtle Conservation Bonaire (STCB) ta bai landa un biaha rònt Klein Bonaire pa rekoudá fondo. Ku e entradanan nan ta spera di por kumpra redanan di investigashon ku nan ke uza na Bahia di Lac. E buélta rònt Klein Bonaire ta mas o ménos 11 kilometer largu. Ku e akshon e organisashon a kolektá 4.000 dòler kaba di e 11.000 dòler ku nan ta deseá.

E tim ta spera di por generá na tur 11.000 dòler. Bahia di Lac tin fèltnan di yerba marino lokual ta un atrakshon grandi pa turtuganan di laman. Pa e turtuganan di laman bèrdè esaki ta un área esensial. Investigashon ku STCB a hasi a mustra ku turtuganan den Bahia di Lac ta krese konsiderablemente mas rápido ku esunnan na kosta wèst di Boneiru. Kresementu mas rápido ta nifiká ku turtuganan ta bira adulto na edat mas hóben i por reprodusí mas promé, lokual ta bon notisia pa e poblashon.

Nètnan nobo ta nesesario pa investigashon 

Ounke generalmente e kresementu den Bahia di Lac ta bon, tin preukupashon resien tokante un bahada leve den e rapides di kresementu di e turtuganan. Posibel kousanan pa esaki ta tiponan di yerba di laman invasivo, kalidat malu di awa i malesanan. Pa komprondé i opservá e faktornan aki mihó, e redanan di investigashon nobo ta esensial. Mester remplasá e redanan aktual  urgentemente.

Dos siman ainda di entrenamentu 

E dos kolaboradónan ku ta bai landa e rònchi no tin eksperensia ku landamentu di distansianan largu, pero nan ta desidido pa landa rònt di Klein Bonaire den un solo biaha. Nan a kuminsá trein na kuminsamentu di yüni i tin mas o ménos seis siman pa prepará nan mes. E landamentu ta planiá pa e siman di 29 di yüli, dependiente e situashon di wer.