Notisia

Kolegio pa Derechonan Humano preukupá pa  klof di derechonan humano entre Hulanda Europeo i Hulanda Karibense

DEN HAAG – Hulanda a hasi muchu tiki adelanto den garantisá derechonan humano ekonómiko i sosial. Esei e Kolegio ta skirbi den su raportahe na e Komishon di Nashonnan Uní, ku ta kontrolá kumplimentu ku e derechonan den e  tratado di derechonan humano. Den su raportahe e Kolegio ta pidi atenshon pa diferente tópiko manera pobresa, salubridat i empleo. A dediká kapítulonan na Karibe Hulandes, kaminda e klof ku Hulanda ta konsiderabel.

E Kolegio ta hopi preukupá ku e falta di protekshon i promoshon di derechonan humano den Karibe Hulandes, pa motibu di e sifranan haltu di pobresa i diferensianan den lei pa protekshon di derechonan humano.

Klof

E instituto ta asentuá ku ainda ta eksistí un klof konsiderabel entre e protekshon di derechonan humano den Karibe Hulandes i Hulanda Europeo. Tratadonan importante, manera e tratado di Nashonnan Uní tokante derechonan di personanan ku un desabilidat, no ta konta den Karibe Hulandes i no tin un lei general aplikabel pa trato igual. Spesialmente riba tereno di entrada i pobresa e diferensia entre e islanan i Hulanda Europeo ta sorpresivamente grandi.

Gobièrnu Hulandes a keda sin atendé e diferensianan den lei i protekshon hurídiko entre Karibe Hulandes i Hulanda Europeo. Tratadonan internashonal di derechonan humano manera e tratado di Nashonnan Uní menshoná anteriormente pa loke ta trata personanan ku un desabilidat i e tratado di Istanbul, no ta ratifiká ainda pa Karibe Hulandes. 

Ademas e lei nashonal pa trato igual, ku ta esensial pa protekshon di derechonan humano na Hulanda, no ta implementá na Karibe Hulandes ainda. Resientemente gobièrnu a anunsiá ku lo introdusí e lei pa trato igual den Karibe Hulandes na yanüari 2023 i e instituto ta suprayá e nesesidat pa ratifikashon rápido di tratadonan internashonal di derechonan humano.

Pobresa

E Kolegio ta preukupá tambe pa e pobresa persistente den Karibe Hulandes, falta di vivienda pagabel, transporte públiko i enseñansa spesial kualitativo. E sirkumstansianan aki a empeorá durante e pandemia di COVID-19.

Ounke gobièrnu a subi e sueldo mínimo legal i ayudo sosial, un simpel oumento di entrada no ta un solushon duradero pa e problema di pobresa. Gastunan haltu di kosto di bida manera awa i koriente, no ta garantia ainda pa un standart di bida adekuá.

Mínimo sosial

E instituto ta aploudí lantamentu di un komishon independiente ku ta investigá e posibilidatnan pa un límite di pobresa pa Karibe Hulandes i ta en espera di e resultadonan den hèrfst di 2023.

Pa motibu di e nesesidat urgente pa protekshon di derechonan ekonómiko i sosial, e insituto ta hasi un yamada riba gobièrnu pa aselerá e esfuersonan pa stipulá un límite di pobresa i mínimo sosial.

Klima

Banda di e aspektonan sosial e instituto ta ekspresá su preukupashon tambe riba e efektonan desproporshonal di kambio di klima riba habitantenan di tantu Hulanda Europeo komo Karibense, en partikular e gruponan vulnerabel ku tin problema pa protehá nan mes. E instituto ta pidi atenshon spesial pa habitantenan di Boneiru, ku ta hopi suseptibel pa e konsekuensianan di kambio di klima. 

Deel dit artikel
Rocargo
Rocargo
Rocargo
Rocargo