Notisia

Kolekshon di foto úniko bèk na Boneiru

KRALENDIJK – E siman aki Fundashon Históriko Kultural Boneriano (FuHiKuBo) a risibí un kolekshon úniko di foto saká meimei di dékada binti di siglo pasá pa Alfons Gabriel, kende a traha komo dòkter na Boneiru. Ta trata di un kolekshon di 100 aña bieu, ku ta duna imágennan bunita i úniko di e isla den e tempu ei.

Alfons Gabriel a biba huntu ku su kasá Agnes na Boneiru di aña 1922 pa 1925. E tabata traha komo médiko di gobièrnu, den un tempu ku e isla aki tabatin solamente un dòkter.

Masoménos 12 aña despues ku nan a bandoná Boneiru dòkter Alfons Gabriel a skirbi un buki na Aleman, Tschogogo, ku ta den kolekshon di FuHiKuBo. Ta un buki ku ta bai tokante naturalesa i e flamingonan di Boneiru. Bòi Antoin a skirbi tambe un vershon na Papiamentu di e buki aki.

Nietu di Alfons Gabriel, Alexander Stagl i su mama Verena Stagl, a keda warda e kolekshon di nan welo/tata hopi bon atraves di añanan. Aña pasá nan a yega na e konklushon ku e bukinan aki mester ta wardá na Boneiru. Markus i Heidi Taurer tabata e promé personanan ku a aserká Venera tokante e kolekshon aki. Komo fotógrafo Markus sa ki importante e kolekshon aki ta pa Boneiru. Pues el a buska kontakto na Boneiru ku organisashonnan ku por a yuda den esaki.

Elena Echavarría, ‘mediator’ na Terramar Museum Bonaire, aña pasá a dediká hopi tempu pa guia e proseso aki pa sòru pa tur kos kana bon i pa Alexander yega serka e ‘stakeholder’-nan korekto. Emma Pratt i Bòi Antoin for di kuminsamentu tabata embolbí. FuHiKuBo lo manehá e kolekshon importante aki. Despues ku kaba prosesá tur kos e kolekshon ta bai den e edifisio di Post & Archief di Entidat Públiko Boneiru, na unda e lo keda wardá. FuHiKuBo ta sumamente kontentu ku diferente organisashon boneriano huntu a hasi esfuerso pa a logra haña e kolekshon aki. Naturalmente FuHiKuBo, na nòmber di e pueblo boneriano, ta hopi gradisidu na famia Stagl pa e kolekshon.

Deel dit artikel
Rocargo
Rocargo
Rocargo
Rocargo