Notisia

Komentario: E aneksonan

Saliendo for di e punto di bista ku kasi ningun hende no ta lesa  aneksonan, minister Schouten den e karta di Reportahe di Progreso di referensia mínimo sosial Karibe Hulandes 2023 na Kamer ta hasiendo ‘window dressing’, lokual ta nifiká akshonnan pa laga algu aparentá mihó.

Skirbí pa Wietze Koopman

Hopi hende na Boneiru a konsiderá nan mes ménos pober kaba, pasobra minister Schouten a hisa e Sueldo Mínimo Legal (WML) te 143 % riba e referensia mínimo sosial. Den e anekso numa ta bin komprondé ku e subida lo no tuma lugá riba término korto, i tambe ku e WML despues di e subida ainda lo no kubri kosto di bida pa esnan ku ta traha.

E subida polítikamente deseá di e WML mester bai den fase segun e minister “Pa evitá desbalanse riba merkado laboral i pa tene kuenta ku e kapasidat finansiero di dunadónan di trabou”. Aparentemente minister Schouten no a logra konvensé e minister di Asuntunan Sosial i di Labor pa laga un parti chikitu di e 500 mion euro anual pa supsidio di gastunan di sueldo pa Hulanda Europeo konta tambe pa e munisipionan Karibense.

E eskases di kobertura di e gastunan ta bini pasobra e minister ta sali for di un referensia. Un referensia ku ta muchu mas abou ku kosto di bida. E minister ta menshoná e montante di e referensia 2023 solamente den e anekso. Den e mésun anekso tin e kosto di bida indeksá di e aña anterior 2022. Aki bou ta sigui e montantenan pa Boneiru:

Referensia 2023 pa soltero:          $ 1.030

Kosto di bida pa soltero 2022:   $ 1.601 (155% di e referensia Schouten)

Kosto di bida pa pareha 2022: $ 2.165 (210% di e referensia Schouten)

Na Hulanda kompleto e sueldo mínimo ta basá riba kosto di bida di un pareha. Ta hasi un eksepshon pa e munisipionan Karibense. Komo munisipio ekstraordinario inkorporá den Hulanda pa kua aparentemente no ta nesesario pa kumpli igual ku e deber di asistensia di Estado.

E minister ta rekonosé ku pobresa ta un problema grandi pa un gran parti di e habitantenan di e tres munisipionan aki, pero no ta menshoná ku esaki ta afektá pa poko 40% di e famianan (e averahe di Hulanda ta menasá di bira 6%). Mester lesa entre e liñanan ku e pobresa aki ta konserní pa gran parti esnan ku ta traha. 

Deel dit artikel