Notisia

Komentario: Koalishon di MPB ku UPB ta tira atrako riba bishitante di Boneiru

Ta basta tempu diputado Hennyson Thielman, huntu ku su tim, a dediká na preparashon di un ordenansa nobo pa kobra bishitante di e isla un forma nobo di impuesto de forma di ‘Tourism Entry Tax’. 

E idea no tabata nobo, ni no ta Thielman ku a bini kun’é. E idea original tabata di lider di PDB, Clark Abraham, ku a yega di sugerí pa deklará hinter Boneiru un parke nashonal, kaminda ku turista tin ku paga pa drenta. Den e konsepto aki, lo a inkluí tur otro sorto di impuesto i sobrekargo, manera e ‘nature fee’ di STINAPA, na lugá di kobra e turista yen di biaha, pa diferente kos. 

E plan original di Thielman no tabata zona malu. Lo a kobra e turista 50 dòler, pero solamente un biaha den kada 12 luna. Na otro banda, lo no a kobra e turista mas pa impuesto riba kamber di hotèl (room tax), òf impuesto riba hürmentu di outo. 

Mester bisa ku for di komienso, no tabata e turista real ku lo a wòrdu perhudiká pa e ordenansa nobo, sino e bishitante ku lo a yega Boneiru pa bishitá famia òf amistat. Nan, aktualmente, no ta kontribuí nada direktamente na kaha di gobièrnu. Ku introdushon di e impuesto nobo, lo a amplia e base di kobransa, ku konsekuensia ku na tur, lo a kobra mas ku ta e kaso awor. 

Pa motibunan ineksplikabel, sin embargo, partidonan di koalishon a kuminsá tòrnu na e konsepto di ordenansa nobo. Asina, segun konsehal Esther Bernabela, lo no mester kobra 50 dòler pa entrada, pero 75. Un oumento, por sierto, di 50%.

Komo sifuera esaki no tabata sufisiente, koalishon den su ‘sabedoria’, a disidí tambe ku lo no bai kobra e impuesto nobo un solo biaha den kada 12 luna, sino kada bes ku e bishitante drenta e isla. Pa realisá bon kon grandi e diferensia aki ta, por tuma un ehèmpel di un pareha ku ta drenta Boneiru tres biaha den un aña. Den e konsepto orginal esakinan lo mester a paga 100 dòler (2 biaha 50 pa persona). 

Den e konsepto nobo, e mesun pareha aki lo mester bai paga no ménos ku 450 dòler (3 x 75 pa persona, dùs na tur 450 dòler). Naturalmente no tur turista lo bishitá Boneiru tres biaha den un aña, pero si e turista yega Boneiru i e ke hera bai dal un keiru pa Kòrsou bin bèk, e lo tin ku bolbe paga 75 dòler, según e ordinansa adaptá. Totalmente ridíkulo!

Pió ta e echo ku e tipo di montantenan aki no ta konta solamente pa estranhero, pero tambe pa e Boneriano ku ta biba ku su famia pafó di e islanan di anterior Antia Hulandes. Nan tambe, huntu ku nan famia, lo mester paga 75 dòler pa persona, pa kada bes ku nan ke drenta e isla. 

Ku e adaptashon di ordenansa deskabeyá partidonan di koalishon a pasa e diputado di turistmo, i tambe  tim di TCB, ku a kuminsá komuniká e konsept di impuestonan nobo ku partnernan den eksterior un klesté enorme! E koalishon a laga su diputado i BC den su totalidat prepará un ordenansa, i den Konseho Insular e plama e konsepto original for di otro, den un sentido di ‘Mayoria ta disidí. 

Por deskribí e lokual ku a sosodé komo nada ménos ku un bòfta den kara di diputado Thielman, BC, TCB, partnernan turístiko i tur bishitante di Boneiru ku ta kai den kategoria di famia òf amigu. Ta asina, den un par di minüt ta tuma desishion di e magnitut aki, sin konsultá na drechi ku otro partnernan den e mundu turístiko òf ku bo propio poblashon? Pió ta ku tras di kòrtina por a skucha e argumento ku ‘ata hende por a paga e tipo di montantenan aki pa pasa tèst di PCR, dus pa kiko lo no por kobra nan 75 pa kada biaha ku nan drenta Boneiru?’ Esta un bon argumento nò? 

Si Thielman tabata tin wes’i lomba, lo e mester entregá su kargo di diputado bèk na koalishon i bisa nan pa nan mes implementá nan koroto. 

Tur hende ta di akuerdo ku Boneiru mester gana mas for di su turismo, pero e mester sosodé na un manera balansá, sin empeligrá e pan di hopi hende ku ta traha den turismio, i sin perhudiká habitante di Boneiru. Pronto habitantenan di Boneiru no por risibí ni famia ni amigu djafó mas na nan kas, sin ku esakinan mester paga sumanan kuantioso pa drenta e isla.

Deel dit artikel
Rocargo
Rocargo
Rocargo
Rocargo