BOGOTA – E kompania di aviashon di baho kosto JetSmart, originalmente di Chile, a kuminsá djaweps ku ehekushon di buelonan entre diferente siudatnan na Colombia. 

E buelonan a bira posibel despues ku JetSmart a logra optené e asina yamá Air Operator Certificate di Colombia, ku kual e aerolínea ta ser konsiderá komo un operador lokal. E aerolínea, ku a eksperensiá kresementu rápido den e último añanan den simannan ku a pasa a ehekutá diferente buelo di prueba, komo parti di e proseso di sertifikashon.

Ku e entrada di JetSmart komo un operador lokal e preisnan di buelo na Colombia a bini bou di preshon. E kompanía nobo ta ofresé un tarifa promoshonal for di mas o ménos 15 dòler pa un biahe di ida òf buelta, inkluso impuesto. Biaheronan na Colombia no a mira preisnan asina abou, for di dia ku ea aerolíneanan Viva Air i Ultra Air a bai fayit. 

Kompetensia

Kompetidónan eksistente na Colombia manera Avianca i LATAM Airlines, no a sinta ketu i a bini ku tarifanan spesial di nan mes, kuminsando ku pasashinan for di mas o menos 18 dòler pa un biahe di ida òf buelta.