WILLEMSTAD – For di febrüari 2024 kompania di aviashon JetBlue ta bai oumentá e buelonan dirèkt di New York pa Kòrsou di sinku pa shete buelo pa siman. E oumento aki ta sigui despues di un ampliashon anterior na luna di aprel di e aña aki i ta un reakshon riba e demanda kresiente kontinuo for di merkado Merikano, segun ofisina di turismo.

Buelonan diario ida i buelta ta posibel saliendo  08.00 for di New York (JFK) i yega Kòrsou 13.25. E buelo di regreso di Kòrsou pa JFK ta sali 14.25 i ta aterisá 18.29. Segun Ruisandro Cijntje, minister di Desaroyo Ekonómiko, esaki ta “un prestashon hopi importante pa sigui stimulá nos sektor turístiko den 2024 i duna asina un impulso na nos ekonomia”.

E oumento di e kantidat di buelo ta resultado di e koperashon estrecho entre JetBlue i sosionan lokal, entre otro Curaçao Tourist Board (CTB), Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA). CTB ta ansioso pa yama mas bishitante di Estados Unido bonbiní i laga nan eksperensiá e bunitesa di nos isla.