Naturalesa i medio ambiente

Kondishonnan di bida seif rondó di seru di shushi dudoso 

KRALENDIJK – Fin di siman ku a pasa Entidat Públiko Boneiru a disidí ku e evakuadonan di e kandela di e seru di shushi por bai kas atrobe. Nan ta mira e besindario di e seru di shushi seif atrobe. Si esaki ta seif di bèrdat tambe ta keda un pregunta grandi pa e habitantenan di Boneiru. Ta keda duda si outoridatnan a tuma mònster di huma pa evaluá si e hairu ku nan ta respirá ta seif.

Siman ku a pasa outoridatnan na Boneiru a hasi nan esfuerso ku alma i kurpa pa para e kandela grandi ku na dos okashon a lanta kabes riba e seru di shushi. Ounke ku ainda tin desaroyo di huma, ta parse ku lo peor ta tras di lomba. A manda e evakuadonan kas den fin di siman ku a pasa. Segun un komunikado di prensa ku Entidat Públiko a parti djasabra último e kondishonnan di bida lo ta for di peliger atrobe. Den konsulta ku diferente eksperto a disidí e ora ei ku e habitantenan por a bai kas atrobe.

Bosero Kenneth Charlemagne di Entidat Públiko Boneiru a laga sa lo siguiente: “E huma a mengua konsiderablemente. E molèster di holó stinki tambe a bira ménos. E molèster di holó stinki por keda presente. Sinembargo ta seif si pa bai kas”.

Djadumingu habitantenan a bolbe konstatá huma den besindario di e seru di shushi. Un di e habitantenan ta bisa lo siguiente: “Djadumingu nos tabatin holó stinki for di 4’or di madrugá. E direkshon di bientu no tabata na nos fabor tampoko. Despues di respirá e huma aki ocho pa djes ora largu, mi garganta ta morde atrobe”.

Duda den seguridat

E pregunta ta keda si e kondishonnan di bida di bèrdat tambe ta seif. Kaminda na momento di e desaster di zeta ku a kuminsá riba 24 di febrüari 2024, tabata parse despues ku no a tuma mònster di e zeta ku a spula bin tera, esei ta parse di ta e kaso tambe na e momento aki ku e huma ku tabata sali. Di e manera aki habitantenan no sa si nan a respirá supstansianan ku ta venenoso i si ainda esei ta tumando lugá. Den un konferensia di prensa siman pasá gezaghebber interino Nolly Oleana a laga sa ainda ku: ‘Na Boneiru no tin ekipo pa midi esaki’. Sinembargo lo a bini refuerso for di Hulanda pa yuda ku e kandela. E no a bisa si e asistensia aki lo a tuma mònster di huma tambe.

E bosero di Entidat Públiko Boneiru tampoko no por a afirmá òf nenga algun dia despues si ainda a tuma mònster di huma pa midi e efektonan ku e huma a laga atras pa hende i bestia. Riba e pregunta ku si e refuerso ku a bini for di Hulanda a tuma mònster di e huma tambe, Charlemagne a kontestá lo siguiente: ‘E pregunta ei mi no por kontestá na e momento aki’. Ku esaki ta keda ainda vago pa e habitantenan rondó di e seru di shushi si por mira e besindario komo seif.

Deel dit artikel
Rocargo
Rocargo
Rocargo
Rocargo