Kralendijk- Miembro di Konseho Insular na Boneiru, Esther Bernabela ayera a sapateá riba e escho ku ora tin reunion di Konseho Insular, e no tin lugá pa stashoná su outo.

“Si tin un kos ku ta hasimi bidem, ta ora nos wòrdu yamá pa reunion di Konseho Insular anto bo kore yega, sin ku tin un lugá pas stashoná bo auto”, asina e konsehal a bisa, di forma pashoná.

Segun Bernabela, no tabata e promé biaha ku ela pidi atenshon pa e falta di lugá di parker. “Nos komo miembro di konseho insular tin ku disidí riba tur sort’i kos importante, pero nos mes no tin lugá pa para nos outo pa nos yega den e sala aki”, asina Bernabela a bisa.

Lugá di parker

Aunke ta un hecho ku tin un falta basta pisá den sentro di Playa pa loke ta lugá di parker outo, ta e mesun Konseho Ehekutivo ta permití konstrukshon di yen edifisio, kaminda no ta eksigí ku ta konstruí lugá pas stashoná outo. Pa algun aña kaba tin problema pa sufisiente lugá di parker i e problema a bira mas grandi só.

Algun aña empresario Gerrit Schoen tabata tin un plan pa konstrui un garashi pa parker outo na lugá kaminda tabata tin Ford Garage di Bonaire Trading Company, pero despues a laga e idea aki para.