Kralendijk- Un reunion di Konseho Insular ayera, ku a dura kasi 3 ora largu, literalmente a wòrdu dediká na papiamentu tokante e agènda di e parlamentu insular.

Despues ku diputado James Kroon a duna un introdushon hopi kòrtiku i superfisial riba e problemátika di e rotònde na Kaya Amsterdam, a sigui debatí solamente riba puntonan di agènda i tambe fecha pa próksimo reunion.

Daisy Coffie, di Frakshon Coffie, tabata visiblemente idigná pa e forma ku kosnan a kana. Clark Abraham (DP) i Michael Pietersz (DP) tambe a ekspresá nan malkontentu.

Rotònde

Pa ku rotònde diputado James Kroon a bisa ku e no por a duna mashá detaye tokante ken a desvia for di diseño orginal i ku tabata pesei a ta bai hasi un investigashon atministrativo pa establesé kon tur kos a kana. E diputado, segun ku e tabata bisa, no tabata kòrda hopi detaye kon kos a kana.

Responsabel

Lider di partido PDB, Clark Abraham tambe a mustra su malkontentu ku e forma di aktua. “Ni maske tin amtenar ta hasi sierto kos, ta BC ta keda responsabel pa su aktonan”, asina Abraham a bisa. Ela mustra tambe riba e echo ku for di BC òf diputado mester a sali sierto firma pa por a kuminsá ku ehekushon di trabou. Abraham a haña hopi remarkabel ku diripiente ni diputado, ni BC no tabata kòrda ningun detaye mas.

Daisy Coffie tambe tabata rabiá. Segun Coffie a mustra, miembronan di Konseho Insular mester a lesa den prensa kiko diputado Kroon a deklará riba asuntu di rotòndo. “No ta asina ku mester a bin duna splikashon na e órgano aki, promé ku a duna konferensia di prensa?”, asina Coffie a puntra.

Mayoria ta dikta?

Por ripará ku koalishon aktual di MPB i UPB ta manera sera kabes huntu, ora ta trata di protehá diputado i BC, pero asta tambe ora ta trata di puntonan simpel komo agènda òf reunion. Gezaghèber Rijna ta pone su mes riba punto ku ‘mayoria ta disidí’, i aunke sea korekto òf no, tur miembro di koalisahon ta vota meskos ‘pro’ òf ‘kontra’ sierto proposishon di nan koleganan den koalishon, i oposishon no por hasi nada otro di sinta mira i konsumí kon hopi tópiko di interes general, manera e investigashon di integridat, pero awor tambe asunto di rotònde no ta wòrdu tratá manera debe ser, simplemente pasombra esaki no ta kumbiní BC na e momento ei.