KRALENDIJK – Despues di lunanan di deliberashonnan interno i konsulta ku otro islanan di Karibe Hulandes, Konseho Insular di Boneiru a prepará un dokumentu yamá “Het Standpunt van Boneirue,” ku nan ta biaha pa Hulanda ku pa abogá pa miho lei i arelgo pa Boneiru. 

E deliberashonan ta forma parti di e revisión di Lei riba Entidatnan Públiko Boneiru, Sint Eustatius, i Saba (WOLBES) i Lei di Finansas di Entidatnan Públiko BES (FINBES). 

E dokumentu ta kontené diestres proposhishon bon fundamentá ku ta enfoká riba mihó bienestar di siudadano i kòntròl demokrátiko di gobernashon. Kuater prinsipionan ta sentral: mantenshon di e ordo legal eksistente, outonomia i autodeterminashon, un struktura di gobièrnu nobo, i diferensashon.  

E proposishonnan ta inklui kambionan den e manera pa kalkulá e asina yamá ‘vrije uitkering’ ku e isla ta risibí tur aña, kambio den nòmber di Boneiru pa “Boneiru/Bonaire” na lugá di Entidat Públiko Boneiru i rekonosimentu di Papiamentu komo un idioma ofisial di gobernansa. Ademas, ta proponé pa nombra un representante permanente na Den Haag i establesé un organismo di gobernashon nobo i independiente pa mihó kòntròl di gobernashon i maneho finansiero. 

Konfiansa

A pesar di e desafionan sperá, miembronan di e Eilandsraad di Boneiru ta warda ku konfiansa e diskushonnan na Hulanda.