Konseho insular ke kompanianan manera Western Union i Moneygram bèk na Boneiru

KRALENDIJK- Konseho insular di Boneiru a akseptá unanimente un moshon kaminda ta pidi pa reintrodukshon di servisionan ku ta permiti transferensia inmediato di plaka pa eksterior, konosí komo transferensianan direkto.

Den pasado, Boneiru tabatin akseso tantu na servisionan di MoneyGram ku a ser ofresé pa MCB Bank i ofisina di pòst, komo tambe na servisionan di Western Union, un provedó di servisio finansiero global ku ta ofresé transferensianan inmediato.

Despues di 10/10/10, e servisionan a desaparsé for di e isla, segun informashon, pasobra partikularmente De Nederlandsche Bank (DNB) ta mira e servisionan di transferensia direkto komo di un riesgo haltu, partikularmente pa e envío di plaka kriminal.

Hulanda

E moshon di Konseho insular ta mustra ku a pesar di e resrvanan di DNB, e servisionan aki ta disponibel na Hulanda, praktikamente den tur siudat di e pais. Segun e moshon ta bisa, tin hopi mayornan ku yunan studiando na eksterior i kaminda ta nesesario i útil pa por transferi plaka rápidamente.

Tambe, e moshon ta menshoná ku hopi stranhero ku ta traha riba e isla tin problema pa manda plaka na nan famia. Spesialmente pa trahadónan di otro pais, falta di servisionan di transferensia inmediato ta presentá retonan serio. No solamente esaki ta rekerí ku nan mes por tin un kuenta bankario, pero esnan ku ta risibí e sèn den eksterior tampoko no tur ora tin akseso na un kuenta bankario pa por kobra e sèn. 

E moshon, presentá pa miembro di Konseho insular Dirks (UPB), ta pidi e kolegio ehekutivo pa realisá un investigashon tokante e posibilidatnan pa reintrodukshon di e servisionannan relevante.