KRALENDIJK- Konseho insular, riba proposishon di Din Domacassé (MPB) a ratifiká un moshon pa kombatí plestik deseschabel na Boneiru. 

For di dia 30 di òktober 2018 miembro di frakshon di MPB, Renata Domacassé, a entregá un moshon den Konseho Insular tokante kombatimentu di plèstik, ku a keda aseptá unánimamente. E moshon a mustra riba e desperdisio di plèstik ku ta forma un problema grandi i ku 80% di tur desperdisio den oséanonan ta konsistí di plèstik. Esaki ta kondusí na formashon di konsentrashonnan gigantesko di desperdisio di plèstik ku ta keda drif riba laman. 

Satisfakshon

Frakshon di MPB ta bisa ku ta ku gran satisfakshon nan a tuma nota di un karta di kolegio ehekutivo  fechá 29 di aprel 2021, kaminda kolegio ehekutivo ta ofresé na konseho insular un ordenansa den konsepto ku lo bai prohibí uso di produktonan di plèstik desachabel. Mester menshoná tambe ku entre e ministerio di Infrastruktura di Hulanda i entidat públiko di Boneiru, dia 17 di yüli 2019 a keda firmá un deklarashon di intenshon, pa den fase eleminá produktonan di plèstik desachabel. 

Den e reunion públiko di konseho insular dia 19 di òktober último, miembronan di konseho insular a bai di akuerdo ku e ordenansa. Pro e ordenansa nobo a vota koalishon di MPB i UPB, huntu ku Daisy Coffie di Frakshon Coffie. Kontra a vota e frakshon di DP ku 3 voto kontra. 

Amplia lista

Miembro di frakshon di MPB, Edwin Domacassé a probechá di e okashon pa entregá un mas moshon ku ta instruí kolegio ehekutivo pa sigui amplia riba e ordenansa pa inkluí mas produktonan di plèstik desachabel ku ta dañino pa nos medio ambiente. Tambe a instruí kolegio ehekutivo pa sondeá e posibilidat i despues konhutamente ku konseho insular introdusí un asina yamá depósito (statiegeld) riba produktonan desachabel manera bòter di plèstik.   

MPB ta di opinion ku hasiendo esaki Boneiru ta dal un paso signifikante den direkshon di durabilidat i ta yega mas serka na e meta di un ‘blue destination’ manera deskribí den e plan stratégiko di turismo Boneiru.