Konseho na OLB: Privatisá TELBO

Kralendijk- Un rapòrt kompilá pa kompania di konsùltent ABDTOPConsult ta konsehá pa -riba termino mas largu- privatisá Telbo. Esaki lo nifiká ku Gobièrnu di Boneiru lo no ta doño mas di e kompania lokal di telekomunikashon.

E rapòrt ta sigui kosehonan anterior, entre otro di e kompania crmLINK, ora ta trata e forma kon Boneiru lo mester atendé ku kompanianan di Gobièrnu ku ta presta servisio di importansia pa e komunidat den su totalidat.

Ta bon pa menshoná ku e konsehero tin un lenk basta direkto ku gobièrno di Hulanda, pasombra e ta sali for di Algemene Bestuursdienst (ABD), ku ta un part di gobièrno hulandes.

Holding

Un promé konseho ta pa kita Bonaire Holding Maatschappij (BHM) komo akshonista di Telbo. Na e manera aki, gobièrno di Boneiru por dil direktamente ku asuntonan di Telbo, sin ku mester bai via Bonaire Holding. Loke a rapòrt not a analisá, ni deskribí ta dikon esaki lo ta bentahoso kompará ku e situashon aktual.

Den pasado a trese kompanianan di Gobièrno bou di kapa di Holding, pa evitá ku polítika lokal lo tabata tin muchu influensia direkto riba e kompanianan aki.

Kompetetivo

E rapòrt ta bisa tambe ku tin diferente kompetidó ta ofresiendo servisio similar ku Telbo riba e isla. Nan ta rekomendá pa Telbo drenta den un ‘partnership’ stratégiko ku otro partido pafó di Boneiru, posibelmente ku e kompania EUTEL i SATEL na respektivamente St. Eustatius i Saba.

Rekomendabel?

Pregunta ta si e loke e rapòrt di ABDTOPConsult ta rekomendá pa ku Telbo lo ta bentahoso pa e isla òf no. Den e rapòrt no ta hasi un análisis profundo di bentaha i desbentaha ku e privatisashon di Telbo lo trese kun’é.

---