WILLEMSTAD- Margy Bond a keda nombrá komo kònsùl nobo na konsulado di Merka na Willemstad. Komo tal, Bond lo sirbi komo kònsùl pa Aruba, Boneiru, Kòrsou, St. Maarten, St. Eustatius i Saba. 

Bond tin mas ku 25 aña di eksperensia den ministerio di asuntonan eksterior na Merka. Asina ela traha basta aña na Afrika. Bond a studia na Harvard i na Georgetown University, na unda ela logra su maestría den asuntunan eksterior. 

Skucha i siña

“Mi ta anhelá pa siña konosé e comunidad riba kada isla, pa skucha i siña, tokante prioridat di hende i di gobièrnunan den e region aki, pa asina konstruí konhuntamente un futuru mas sigur i mas próspero”, asina Bond a bisa.