KRALENDIJK – E kònteiner supteráneo ku a plania den Kaya Isla Riba ta kousa preukupashon serka habitante- i empresarionan den besindario. Anteriormente e aña aki a anunsiá e proyekto komo un paso den modernisashon di e maneho di sushi na Boneiru, pero ta parse ku e ehekushon no ta bai sin opstákulo.
Ya pa lunanan largu ta sosodé tiki ku e kònteiner di sushi supteráneo na Kaya Isla Riba i e espasio habrí kaminda e kònteiner lo a bini ta keda sin mishi kuné. Esaki a kondusí na preukupashon pa seguridat i e estado general di e besindario. Na luna di ougùstùs habitantenan a ekspresá nan malkontentu kaba riba e proyekto ku a keda ketu ketu. Apesar di ekspreshonnan anterior di kolegio ehekutivo, kaminda a deklará ku e solushon ta serka, ta parse ku den práktika tòg esaki no ta e kaso.
Kompania di prosesá sushi Selibon ta reakshoná via un bosero riba e situashon: “Na e momentu aki e infrastruktura sivil aktual no ta kumpli ku e eksigensianan pa instalashon di kònteinernan supteráneo. A traspasá e problema pa e gerensia aktual, i aktualmente ta buskando informashon pa haña un solushon apropiá. Ounke lo por dura algun tempu promé ku reanudá e proyekto, lo tapa e espasio habrí riba término korto pa motibunan di seguridat.”