Gobièrnu

Kontròl èkstra na bich i kunuku durante dianan di Pasku

Gobièrnu no ke mira aglomerashon ni na kunuku, ni na bich den dianan di pasku. Foto: Bert Nijland

Kralendijk – KPCN i Direktorado di Supervishon i Mantenshon ta kontrolá èkstra durante e dianan liber di  Pasku di Resurekshon na playa i na kunuku.

Ta kontrolá pisá si hende ta tene nan mes na playa na e prohibishon pa kamper. Na playa, riba laman i na kunuku tin un prohibishon pa aglomerá. Ta prohibí tambe pa bebe alkohòl den espasio públiko manera na playa. E kontròlnan severo ta nesesario awor ku a prolongá e lockdown ku dos siman pa evitá ku e vírùs di corona ta sigui plama.  

Será

Bièrnè Santu i promé dia di Pasku di Resurekshon pakusnan i tiendanan ta será. Hende por skohe pa bai playa e ora ei. KPCN i Direktorado di Supervishon i Mantenshon  lo pone bòrchi na playanan pa kòrda e bishitantenan na e medidanan severo. Hendenan ku ta biba huntu den un kas tin mag di bai playa òf kunuku.

Pero no ta e intenshon ku aya nan tin kontakto ku personanan ku nan no ta biba den kas kuné. Gezaghèber Edison Rijna a deklará anteriormente ku por lo pronto e no ke un prohibishon pa bai playa. Rijna ta haña ku siudadano mester tin chèns pa distraí.  Gezaghèber ta ferwagt sí ku e siudadanonan ta tene nan mes na e reglanan en bista di e kasonan di kontagio na e isla.

Deel dit artikel
Rocargo
Rocargo
Rocargo
Rocargo