KRALENDIJK- Riba dia kuater di mart binidero, ta inisiá ku weganan di e torneo Kopa Lito Pony Baseball Bonaire. E weganan ta tuma lugá na vèlt Dudi Josephia, ántes Ama’s. 

Direktor di Maduro & Curiel’s Bank Bonaire (MCB), Leonard Domacasse, a papia durante un rueda prensa ku tabatin e siman aki, pa ekspresá nan apresio ku nan tin pa kontribuí na e torneo organisá pa Bonaire Wolf-Pack Baseball Foundation. 

”Kopa Lito a bira un tradishon pa Boneiru. Kopa Lito Pony Baseball Bonaire, un torneo organisá pa Wolf- Pack, kaminda hopi mucha ta bai partisipá den e weganan.  E fundashon, a kuminsá ku muchanan di edat 3 pa 8 aña i awor ya nan a amplia i ta organisá torneo pa hóben. Nan ta pèrkurá pa un grupo grandi di mucha ta aktivo den deporte na Boneiru. Pa nos di MCB, ta un gran honor pa kontribuí na evento aki“, asina Domacasse a bisa.