Notisia

Kòrsou lo ta pionero ku bùsnan eléktriko riba energia solar

WILLEMSTAD – Seis bùs di ABC-busbedrijf (ABC) ta bai kore riba energia solar. Ta bai konstruí un parke solar, ku lo mester bai sòru pa koriente pa esei.

Den un koperashon ku a anunsiá e siman aki ABC, RdK i Nederlandse VDL Groep a firma un akuerdo pa generá energia di solo via un PV Solar Park.

E parke aki, ku doño di refineria RdK lo konstruí, ta hasi uzo di terenonan ku ta disponibel pa rehabilitashon. E energia ku ta generá ta bira entre otro e fuente di rekargá pa seis bùs eléktriko di ABC.

VDL Groep, un empresa industrial internashonal, ku ta desaroyá, produsí i bende sistemanan pa almasená energia i bùsnan eléktriko, lo suministrá e panelnan solar, bùsnan eléktriko, infrastruktura pa karga, sistema pa almasená bateria i e Sistema di Maneho di Energia korespondiente. ABC lo uza e bùsnan aki pa transporte públiko di Kòrsou.

E proyekto E-mobility aki ta un di e promé inovashonnan ku ta resultado di e estudio  Op weg naar een Living Lab Curaçao. Riba enkargo di RdK, den koperashon ku diferente NV di gobièrnu, ministerionan, Universidat di Kòrsou i empresanan Hulandes, entre kua VDL, TNO a realisá e studio aki.

Loke ta hasi e proyekto aki úniko ta ku por uza e bùsnan-‘Zero Emission’ kompletamente off-grid pa e transporte públiko na Kòrsou. Ku esaki Kòrsou ta pone su mes riba mapa komo lider riba tereno di mobilidat sostenibel eléktriko off-grid inovativo, segun e promotornan. 

E resultadonan di e proyekto pionero aki por sirbi komo ehèmpel pa otro paisnan dentro di Reino i den region pa realisá semehante inisiativanan. Ku elektrifikashon di transporte públiko Kòrsou ta dal un stap krusial pa un futuro mas sostenibel.

Deel dit artikel
Rocargo
Rocargo
Rocargo
Rocargo