WILLEMSTAD – Gobièrnu di Kòrsou a disidí pa mantené e tarifa pa rekuperá koriente bèk pa konsumidó- i empresanan ku ta generá koriente mediante  panelnan solar na un nivel di 25 sèn pa kWh.

For di 2011 ta posibel pa personanan individual i empresanan na Kòrsou generá koriente pa propio uso mediante panelnan solar den kombinashon ku un konekshon di ret. Huntu ku esaki ta fiha e tarifanan anual pa e period di rekuperashon.

‘Manteniendo e tarifanan pa rekuperashon aktual entrante 1 di yanüari 2023 ta pèrkurá ku personanan individual òf empresanan por realisá un periodo di rekuperashon realístiko, ku aktualmente asta ta bou di e periodo di rekuperashon internashonal komun’, gobièrnu di Kòrsou ta skirbi.                                                                                                          

‘Alabes ku esaki e gastunan di kompra pa e kompania ta relativamente di akuerdo ku e klousula di kombustibel komo parti di tarifanan di uso final pa koriente’.

Segun gobièrnu e merkado pa panelnan solar a kontinuá na 2022 i a bira mas fuerte. E faktor mas importante den esaki ta e invershon promedio pa instalashon di panelnan solar ku ta keda kasi méskos, den kombinashon ku un nivel un tiki mas haltu di tarifanan final di uso regular pa koriente.

Pa motibu di e redukshon ku esaki ta trese kuné, e tin un efekto faborabel riba e periodo di rekuperashon pa konsumidónan final ku propio produkshon di elektrisidat duradero pa propio uso. 

Kompensashon di ret di elektrisidat

Mediante e ‘Tariefrichtlijn kleinschalige duurzame stroomvoorziening’ gobièrnu di Kòrsou a disidí awor pa no kambia e tarifanan.

E kompensashon fiho ku doñonan di panel solar mester paga pa kubri gastunan di uso i disponibilidat di e ret di koriente, e konekshon na e ret i e kapasidat di produkshon tambe ta keda vigente

Pa uso di kas mester paga ocho florin pa ‘kilowattpiek’, pa empresanan e ta djesseis florin. E unidat di midi ta mustra e kapasidat ku un panel por entregá den situashonnan optimal.