KRALENDIJK - Korte den promé instansia na Boneiru a destruí e desishon di Reino pa intervení den e situashon di e basura di Selibon na Lagun. Wes a determiná ku Representante di Reino mester a duna e kolegio ehekutivo di Boneiru un último chèns pa aktua nan mes, promé ku e intervenshon di su parti.
E desishon a sigui despues ku e kolegio ehekutivo di Boneiru a entamá un kaso kontra e desishon di e Representante di Reino pa asumí e otorgashon di permit, supervishon i ehekushon na Selibon na Lagun. Representante di Reino a tuma e desishon di intervení dia 15 di novèmber 2024 debí na fayansanan struktural den e maneho di shushi i problema ambiental na e lokalidat.
Korte ta rekonosé ku tabatin deskuido di responsabilidat dor di kolegionan ehekutivo den transkurso di e añanan. Durante hopi aña no a tuma medida pa loke ta permit i violashon di norma i regla, loke a hasi ku e situashon na Selibon a wòrdu klasifiká komo urgente i preokupante. Rapòrtnan di inspekshon di e Inspekshon di Ambiente i Transporte (ILT) a sostené e konklushonnan ku e peligronan ambiental i riesgonan pa salú públiko tabata oumentá mas i mas.
No a kumpli paso di eskalashon gradual
Sinembargo, Korte tambe a determiná ku e Representante di Reino no a kumpli ku e pasonan di e “eskala di intervenshon atministrativo” segun ku ta establesé den e maneho pa intervenshon den kaso di neglisensia di tarea. Segun e maneho aki, un órgano atministrativo mester primeramente haña e oportunidat pa tuma medida korektivo nan mes, ku eksepshon di un situashon di emergensia agudo.
Ounke e situashon por a wòrdu konsiderá urgente, Korte a konsiderá ku tabatin posibilidat pa duna e kolegio ehekutivo un plazo kòrtiku pa nan mes aktua.
E desishon di Wes ta nifiká ku ta kolegio ehekutivo mes ta bolbe bira responsabel pa aktua den e kaso di Selibon. Wes a pone si ku mester sigui ku implementashon di medidanan ku a tuma kaba i ku Representante di Reino i Kolegio Ehekutvo mester sigui aktua konhuntamente.