WILLEMSTAD –  Korte di Kòrsou no a duna veredikto ainda den e kaso di revishon Vernond Rombley. Abogadonan Geert-Jan Knoops i Carry Knoops-Hamburger a entamá e kaso pasobra nan lo tabatin prueba ku Rombley ta inosente i lo ta víktima di un fayo hudisial.

A sentensiá Vernond Rombley pasobra e lo a tira doño di un supermerkado Chines mata na 2014. Pero segun e duo di abogado ta resultá for di investigashon nobo ku e no por tabata e tiradó. E prueba ekskulpatorio mas fuerte posibel segun e abogadonan ta ku e tiradó  lo tabata mas kòrtiku di estatura ku Rombley. Esei ta sali na kla for di imáhennan di kamera di e nogoshi.

Korte a ordená awor ku e Instituto Forénsiko Hulandes (NFI) mester bai hasi investigashon di e largura di kurpa di e hòmber riba e imáhennan ku a kometé e asesinato. Ta mantené e petishon pa e revishon te ora ku NFI a hasi e investigashon. 

No por mira e kara di e asesino bon riba e imáhennan. Segun e abogadonan ta resultá for di e peñá i e forma di e sejasnan ku Rombley no por ta esun kulpabel. Pero Korte a pone e argumentonan aki un banda. No ta hasi nada tampoko ku e akusashonnan ku polis lo a eliminá mensahenan di WhatApp for di telefon di e sospechoso.

Rombley no a bini nunka ántes den kontakto  ku hustisia. El a aparesé den e sistema serka polis pasobra e tabata manda mensahenan di WhatApp pa su amiganan, kaminda e tabata atmití e asesinato. KRO-NCRV a traha anteriormente e aña aki un seri  dokumental De zaak Rombley.

Kontrali na Hulanda, kaminda Korte Supremo ta atendé petishonnan pa revishon, na Kòrsou Korte mes ta atendé e tipo di kasonan aki. Tres wes di Korte mester husga riba tres kolega wes di djes aña pasá.

Na final di huisio e desepshon tabata grandi serka famia di Rombley, pasobra Korte a husga solamente riba un aspekto loke podisé ta un novedat: un pida nobo di material di informashon.