KRALENDIJK- Djabièrnè atardi un kran mester a yuda pa hisa un kashi nobo pa Bonlab pa por a pone esaki drenta riba e di dos piso di e edifisio.
Segun Anneke Visser, direkor di Bonlab, ta trata di un asina yamá Bio Safety Cabinet ku ta protehá e analistanan di materialnan potensialmente peligroso pa nan salú. “Ya nos tabata tin un kashi asina, pero a muda esaki bai nos laboratorio di awa. Ya ku awor aki nos ta tèst no solamente awa di bebe, pero tambe awa sushi, di laman i di pisina”, asina Visser a splika.
Den promé instante a pensa ku lo por a subi e kashi nobo ku left bai ariba, pero esaki a resultá muchu grandi, di moda ku a disidí di hisa esaki ku e kran pa di dos piso i asina hinka esaki via di porta mesora riba e di dos pis.
Segun Visser a splika, djasabra lo instalá e Bio Safety Cabinet nobo, ku lo usa pa otro tipo di tèst ku e laboratorio ta hasiendo.
Progreso
Ounke ku te ku poko tempu pasá e eksistensia di Bonlab tabata parse di ta na peliger, awor aki por papia di ekspashon i un bida nobo pa e laboratorio ku ta kai bou di Bonaire Holding, komo kompania di gobièrnu.