WILLEMSTAD – Luna pasá e grado di okupashon di hotèlnan na Kòrsou tabata kasi 70 porshento i un oumento di djesshete porshento den rendimento pa kada kamber ku ta disponibel. E porsentahe aki ta algu mas ku aña pasá. Tambe Kòrsou a yama bonbiní na luna di dezèmber 2023 na mas ku 63.000 bishitante, ku a keda mas ku un dia. Segun CHATA, e organisashon di interes di e sektor hotelero, esei ta 41 porshento mas ku na luna di dezèmber 2022.

Jim Hepple, direktor interino di CHATA, ta remarká ku ounke e fluho di turista ta haltu, 55 porshento ta keda den akomodashonnan alternativo, manera hür pa término korto den kasnan privá, apartamento i serka famia òf amigu. Esaki ta un subida kompará ku e 44 porshento na luna di dezèmber 2022.

Hepple ta sigui mustra riba e konekshon aereo nobo for di Amsterdam, ku a kondusí na un oumento di 29 porshento na bishitantenan Hulandes. Remarkabel ta ku kasi 93 porshento di e bishitantenan èkstra aki ta skohe pa akomodashonnan alternativo.

Kontrali na e bishitantenan Hulandes, mas ku sesenta porshento di turistanan Merikano a keda den hotèl. Sinembargo e kantidat di turista Merikano ku ta skohe pa akomodashon alternativo a bira dos bes mas grandi kompará ku aña pasá.

Hotèlnan na Kòrsou ta raportá un tarifa di dia promedio di 252 dòler na luna di dezèmber 2023, lokual ta djeskuater porshento mas haltu ku e aña anterior. E rendimento pa kamber ku ta disponibel a baha ku djesshete porshento te 176 dòler.

Henter 2023

Durante aña 2023 hotèlnan na Kòrsou a alkansá un grado di okupashon promedio di 72 porshento, kompará ku setenta porshento na 2022. E preis promedio pa kamber a subi ku ocho porshento i e rendimento promedio ku kasi 12 porshento.

E kantidat di bishitante ku a keda Kòrsou mas ku un dia na 2023 tabata kasi 583.000, loke ta 93.000 mas ku na 2022. Di esakinan 44 porshento a keda den akomodashonnan alternativo, un subida leve kompará ku aña pasá.

Interesante ta ku, ounke e kantidat di bishitante Hulandes ta birando ménos ku djesdos porshento, e kantidat ku ta keda den akomodashonnan alternativo a baha ku solamente dos porshento. Serka turistanan Merikano nos ta mira un kresementu di 51 porshento, pero e kresementu den estadianan den hotèl ta keda aki algu atras.

Segun AirDNA.com Kòrsou tabatin na luna di dezèmber 2023 kasi 3.640 lugá aktivo pa hür pa término korto, 24 porshento mas ku e aña anterior.