Kushina di Bario Nort’i Salinja: kuminda ku habitantenan di Nort’i Salinja ta kushiná pa otro habitantenan di e bario

Kralendijk – Kandela tabata haltu bou di e weanan di Kushina di Bario Nort’i Saliña. Kushina di Bario Nort’i Saliña ta un kolaborashon entre Entidat Públiko Boneiru i e kompania Yuma Coaching & Cooking. E proyekto ta kushiná kuminda pa habitantenan di e bario Nort’i Saliña. Kuater habitante di Nort’i Saliña ta prepará i kushiná e kumindanan akí. Kushina di Bario Nort’i Saliña ta drai for di yüni 2021. E tim di Kushina di Bario Nort’i Saliña ta motivá pa traha duru pa e habitantenan di bario. Riba djaweps 29 di yüli 2021 direktor di Komunidat i Kuido Silvana Janga-Serfilia tabata di bishita na Kushina di Bario Nort’i Saliña.

Banda di e funshon práktiko di kushiná kuminda salú, Kushina di Bario Nort’i Saliña tin un funshon sosial tambe, esta di partisipashon i konekshon den bario. E meta final di e proyekto ta pa aktivá hendenan di kada bario pa prepará, kushiná i sirbi kuminda na e personanan ku tin nesesidat di esaki.

E trahadó di bario ta informá ken ta e personanan ku ta bini na remarke pa kuminda. E tin bon bista riba ken ta sali benefisioso pa risibí esaki. En general ta trata di hende mas grandi, ku tin ku biba di un penshun òf hende ku ta alehá di merkado laboral i pa e motibu ei ta biba di ònderstant.

Reakshon di e habitantenan di bario ta hopi positivo. Nan ta duna hopi kòmplimènt pa e kumindanan i e klientenan hopi biaha ta para kla kaba ku nan baki reusabel pa risibí nan kuminda.  Nort’i Saliña ta un bario kaminda tin hopi konekshon sosial: tin hopi laso familiar den e bario i duna un aporte na e proyekto akí pa e tim ta un manera pa duna bèk na e bario i na esunnan pa kende bida ta un tiki mas difísil. E otro barionan na Boneiru por tuma Kushina di Bario Nort’i Saliña komo ehèmpel: habitante di bario ta kushiná pa habitante di bario.

Lesa tambe:

• 
  Edison Rijna nombrá komo representante spesial
• 
  Avion di EZ Air a desviá pa Cúcuta
• 
  Dos hóben Boneriano ta inisiá akshon di ayudo  
• 
  Stichting Dierenlot a hasi donashon di kuminda di bestia na banko di kuminda
• 
  Vakatura General Manager Beveiligingsbedrijf Bonaire