KRALENDIJK – Den oranan di mardugá riba e promé dia di aña, un insidente a tuma lugá na un establesimentu di hóreka na Saba durante kua un agente polisial di Kuerpo Polisial Hulanda Karibense (KPCN) a saka su arma reglamentario di servisio. 

Pa agregá na e komunikashon anterior, direktiva di KPCN ta informá ku banda di un investigashon interno dor di Ofisina di Asuntunan Interno (Bureau Interne Zaken – BIZ) di KPCN, tambe a inisiá un investigashon penal na e komportashon di e agente polisial. Reshèrshi di Reino (Rijksrecherche) ta kondusí e investigashon aki. E investigashon lo bai trese mas klaridat di e susesonan. Entretantu direktiva di Kuerpo a pone e agente polisial riba “non-actief” i e no ta na Saba mas. 

Segun KPCN e trahadónan di KPCN ta dediká nan mes 24/7 di un manera kualitativo, integró i profeshonal pa habitantetnan di e islanan. Kuerpo tin komprenshon pa e sintimentunan di habitantenan di Hulanda Karibense, en partikular, relashoná ku e insidente aki, den e komunidat di Saba. 

Rekuperá konfiansa

E insidente aki a kousa daño na e konfiansa den Kuerpo. Direktiva di Kuerpo ta balorá transparensia i lo hasi tur kos nesesario pa rekuperá e konfiansa aki.