KRALENDIJK- Ultimamente tin vários ladronisia atro ta tumando lugá na diferente akomodashonan turístiko. Den esaki por nota hopi interes den artikulonan elektróniko ku turistanan ta trese Boneiru durante nan biahe. 

Riba djadumingu 25 di yüli a drenta keho di kiebro den un akomodashon turístiko situá na Sabadeco. Entre 6 or di atardi i 10.15 or di anochi deskonosínan a forsa un porta pa drenta e kas i bai ku entre otro: dos lèptòp kolo kòrá kimá marka Microsoft, modèl Surface Pro, un tas di kámara kolo pretu ku den dje un kámara i tres lèns di marka Nikon, un ‘headphone’ di marka Bowers & Wilkin, un oloshi i armbant di oro i kaha di joya ku kontenido. 

Riba mesun dia a drenta keho di kiebro den un akomodashon turístiko situá na Punt Vierkant. Aki entre 6.30 or di atardi i 10.30 or di anochi, deskonosínan a forsa un skùifdùr pa a drenta. Nan a bai ku entre otro iPad Pro, Macbook Pro, un lèptòp di marka HP, vários paña i sapatu di marka, joya i tres tas di marka Louis Vuitton.