KRALENDIJK- E líder di M21, Daisy Coffie, a yega na urna di Jeugdhuis Jong Bonaire, kaminda ela vota. Por a nota ku Coffie a yega e urna den un ròlstul. 

Segun e lider di partido ros mes a splika, aktualmente e tin un problema ku su rudia, ku ta impidiele pa kana. Tòg, segun Coffie a bisa, esaki no tabata tin un impakto riba e kampaña. “Den último dianan aki, i tambe den riba e dia di elekshon nos hendenan a traha hopi duru”, asina Coffie a bisa. 

Coffie a mustra su mes optimista tambe. “Nos ta spera ku nos por saka 5 asiento, pa nos por hasi un diferensia di berdat”, asina Coffie a bisa. Di otro banda e lider di M21 a bisa ku despues di elekshon lo wak ku ken lo sinta huntu, pa por traha palabrashon ku otro.