Notisia

Lo no tin stapnan ireversibel na Sint Eustatius despues di elekshon na luna di mart

ORANJESTAD – Sekretario di estado Alexandra van Huffelen ta primintí di no tuma pasonan ireversibel ora restablesé demokrasia na Sint Eustatius. Esei e ta skirbi Tweede Kamer.

Tabatin pregunta tokante duna e derecho presupuestario bèk na konseho insular despues di elekshon di 15 di mart.

E derecho presupuestario ta e derecho di gobièrnu i konseho insular di Sint Eustatius pa kontrolá i definí e entrada- i salidanan. E derecho presupuestario ta un instrumento importante pa garantisá kòntròl demokrátiko riba tomo di desishonnan finansiero di gobièrnu i ta pèrkurá ku gobièrnu ta duna kuenta i rason na pueblo.

Intervenshon

Na febrüari 2018 gobièrnu Hulandes a intervení na Sint Eustatius, a manda konseho insular kas i a instalá un komisario di gobièrnu pa pone òrdu atministrativo, despues ku a resultá ku mandatarionan lokal no ta respetá lei.

Dunamentu bèk di e derecho presupuestario ta mará na tres kondishon. Prosesonan finansiero mester ta digitalisá i sentralisá. Planifikashon i siklo di kòntròl tambe mester kana segun Lei di finansas entidatnan públiko BES, FinBES, i tur akshon di e Plan di Akshon atministrashon finansiero mester ta kla.

Despues di elekshon tambe mester implementá stapnan di mehorashon, e sekretario di estado ta skirbi. Mas rápido posibel despues di elekshon e lo sinta ku e diputado- i miembronan di konseho insular nobo i puntra nan pa komprometé nan mes pa realisá e stapnan di mehorashon aki.

“Sin kompromiso ámplio di gobièrnu ta retené e Koninklijk Besluit pa duna e derecho presupuestario bèk”, segun Van Huffelen

Ta definí e stapnan di mehorashon den e akuerdonan atministrativo nobo ku e sekretario di estado lo firma e aña aki ainda ku e gobièrnu nobo.

Deel dit artikel
Rocargo
Rocargo
Rocargo
Rocargo