M21 ku promé dia di Labor Impakto Sosial

KRALENDIJK – Partido polítiko M21 di lider di frakshon Daisy Coffie a organisá un dia diloke nan ta deskribí komo Labor Impakto Sosial.  

E partido a bai pa e parti suit di e isla pa limpiá baskanti ku ta keda tira riba kosta den e área. Mirando e kantidat di sakunan di sushi por papia di un akshon hopi necesario. 

Na tur e boluntarionan di M21 a rekoré un distansia di 8 kilometer, for di e instalashonnan di Trans World Radio te na Pink Beach. 

Na final di e akshon, Coffie a mustra su mes kontentamentu tokante e resultadonan. “Esaki ta bini for di e filosofia di nos partido, kaminda nos tambe kier pone nos mes na servisio di komunidat.  Ademas, nos komo M21 tambe kier duna e ehèmpel di un Bon Siudadano”. E akshon di limpiesa aki ta un di e hopi punto di akshon ku e partido ainda tin riba nan agènda. 

E siguiente dia di trabou pa un bon kousa ta planiá pa dia promé di yüli benidero.