Den Haag – E Interparlementair Koninkrijksoverleg, IPKO, ta kuminsá mañan na Den Haag. Delegashonnan di Parlamentunan di Aruba, Kòrsou i Sint Maarten ta reuní ku Staten-Generaal, enkabesá pa e presidente di komishon fiho pa Relashonnan di Reino di Tweede Kamer, Mariëlle Paul.

IPKO ta tuma lugá kada seis luna, komo instrumento di komunikashon direkto i enkuentronan personal entre e miembronan di e kuater paisnan den Reino: Kòrsou, Aruba, Sint Maarten i Hulanda.

Despues di e negosashonnan ta presentá e kompromisonan ku a logra na e kabinete pa un reakshon. Na luna di yanüari próksimo e reunion ta tuma lugá riba un di e islanan den Karibe, na luna di yüni Eerste i Tweede Kamer ta organis’é atrobe na Den Haag. Tempu di krísis di corona na 2020 i 2021 a tene algun enkuentro onlain i a hala e enkuentro ku mester a tuma lugá na Sint Maarten na luna di yanüari pa luna di mei último.

Agènda 

Riba agènda tin entre otro e konseho boluntario di Kuerpo di Konseho di Reino, diferente tratado, kolonialismo i e pasado di sklabitut. E reunion ta start mañan ku un reunion inougural den e sala plenario di Eerste Kamer.

E reunion  interparlamentario ta finalisá djabièrnè 30 di sèptèmber den Tweede Kamer, kaminda ta komprobá i firma e lista di akuerdo i lo tin un konferensia di prensa konhuntu.

Por sigui e deliberashonnan ku ta tumando lugá den Tweede Kamer via e livestream di Tweede Kamer i  e app Debat Direct. E orarionan ku por sigui esaki riba e islanan ta:

Djamars 27 di sèptèmber 08.00-09.30 i 10.45-11.00 ‘or

Djarason 28 di sèptèmber 04.00-06.30 i 08.00-08.45 ‘or

Djabièrnè 30 di sèptèmber 04.45-05.45 i 08.00-09.00 ‘or

Por sigui e enkuentronan públiko den Eerste Kamer bibu via

https://www.eerstekamer.nl/plenaire_vergadering/20220927/live.

E parti den Tweede Kamer por sigui via  https://www.tweedekamer.nl/vergaderingen/livedebat/troelstrazaal