Kralendijk – Riba djaweps 2 di sèptember 2021 despues di 18 luna temporada krusero ta ranka sali atrobe. E promé barku krusero ku ta yega Boneiru ta Equinox di Celebrity Cruises.

Equinox a keda eskohé komo ‘2020 Best Service’ den kategoria di ‘Large Ship’ di Cruise Critic Cruiser’s Choice Awards. E barku ta di klase Solstice i ta hasi uso di diferente sistema sostenibel na bordo. E ta sali for di Florida i lo drenta na Aruba, Kòrsou i Boneiru. Na luna di òktober ta añadí un prome stòp na Bahama’s. Dia 2 di sèptèmber e barku ta nabegá na 40% di su kapasidat i ta yega Boneiru ku mas òf ménos 1120 pasahero na bordo.

Bakuná

Tur miembro di tripulashon ta kompletamente bakuná. Promé ku salida nan tabata 14 dia den karentena na bordo i lo keda hasi tèst semanalmente. Pa motibu ku Equinox no tin hopi mucha bou di 12 aña na bordo, e barku ta nabegá ku mas òf ménos 98% di su pasaheronan ku ta kompletamente bakuná. Kontròl na bordo ta severo i den kaso di síntomanan ku tin di haber ku Covid e barku krusero tin su propio personal médiko, ekipo pa hasi tèst i departamentonan spesial kaminda por pone pasaheronan den karentena òf den isolashon. Celebrity Cruises ta bisa ku nan no ta bai buta preshon riba kapasidat médiko di e destinashonnan ku nan ta bishitá.  

Industria krusero ta hiba un maneho hopi estrikto i ta enkurashá pasaheronan pa subi kompletamente bakuná na bordo. Riba Equinox pasaheronan (di 12 aña bai ariba) ku ta kompletamente bakuná mester mustra nan prueba di bakunashon kompleto i un tèst negativo di Covid promé ku salida for di e haf di orígen. Pasaheronan ku no ta (kompletamente) bakuná mester hasi un tèst di PCR na e terminal promé ku nan subi na bordo i nan mester mustra un resultado negativo di un tèst antigéniko ku no ta mas bieu ku 24 ora na momentu di desembarká na Boneiru.

Kontentu

‘Nos ta kontentu ku despues di 18 luna nos por kuminsá atrobe ku nos industria krusero i den koperashon estrecho ku Departamento di Salbridat Públiko Boneiru, TCB, stakeholdernan i e kompania krusero nos a prepará nos mes pa e dia akí pa un komienso seif. Despues di un periodo largu empresarionan i doñonan di negoshi ku pa motibu di e medidanan di Covid-19 a pasa den tempunan ku hopi desafio ta bai mira aktividat ekonómiko atrobe. E promé yegada di e barku krusero ta duna nos e oportunidat tambe pa evaluá i adaptá pa sobrá di e temporada’, segun Hennyson Thielman, diputado di Desaroyo Ekonómiko i Turismo.