ORANJESTAD - E mancha di zeta na e refineria El Palito na Venezuela no tin impakto riba e islanan ABC. Esei e Organisashon di Maneho di Krísis, CMO, a informá djaluna mèrdia na Aruba.
Despues di e insidente resien na e refineria El Palito, kaminda zeta a drenta Bahía Morrocoy, CMO a keda vigilá e situashon ku hopi atenshon den koperashon ku e kapitannan di haf di Kòrsou, Boneiru i Ministerio di Obra Públiko.
E tim ta desaroyando modelonan pa evaluá e posibel impakto riba e islanan ABC, kaminda ta tene kuenta ku patronchinan di bientu i koriente.
Segun CMO e modelonan aktual no ta duna indikashon di impakto riba e islanan ABC, sinembargo e tim ta keda alerta i ta opservá e situashon konstantemente, meskos tambe e modelonan di impakto.
Si ta nesesario lo tuma medidanan adishonal pa minimalisá e impakto riba medio ambiente.