KRALENDIJK – Tourism Corporation Bonaire (TCB) a lansa un mapa nobo di Rincon; nèt na tempu pa e festividatnan kultural den e pueblo mas bieu di Boneiru. Ta trata di un inisiativa di Virgy Balentin, parti di e tim di merkadeo di TCB.
Virgy, ku tin lasonan fuerte ku Rincon, ker a pone atenshon riba un banda di Boneiru ku hopi bes ta keda sin atenshon. Inspirá pa su raísan i komentario di komersiante lokal, e ta buska duna bishitante un komprondementu mas profundo di e historia, kultura i atrakshon di e pueblou. Hopi turista ku ta bai pa Parke Nashonal Washington Slagbaai ta mustra interes den loke Rincon tin pa ofresé.
E mapa a bira un guia práktiko i atraktivo, ku puntonan importante i rekomendashonnan den Rincon. For di promé di aprel, e mapa ta disponibel na TCB i lo wòrdu distribuí durante e luna na negoshinan lokal.
Apresio
E direktor statutario interim Elesiër Angel a ekspresá su apresio pa e dedikashon di Virgy i a agradesé tambe e departamento di R&O di Openbaar Lichaam Bonaire pa a proveé un mapa detayá ku a yuda den e desaroyo.